03.09.10 Framgang for G12

Vann mot Førde: Tambar Fotball sitt G12-lag vann torsdag kveld mot Førde 2 på Naustdal stadion.
På bildet ser vi Martin Hamre (t.v) Simon Indrekvam. Arkivbilde.

Tambar Fotball sitt G12-lag fekk sin fyrste seier i haustsesongen, då laget møtte Førde 2 på Naustdal stadion torsdag kveld.

Trenar Ivar Longvastøl har sendt oss fyljande rapport:

" Etter to tap i starten på haustsesongen, tok lillegutane ein solid siger over Førde 2 på Naustdal stadion torsdag kveld.

Både innsats og formasjonar var betre enn i dei to føregåande kampane.

Martin Andre Seljevoll spelte i ny posisjon som defensiv midtbanespelar, og han gjorde ein svært god jobb både ved å vinne ballen og levere smarte pasningar til medspelarane.

Elles bra jobbing på alle plassar. Målscorarar denne gongen var Sigve Heggedal Longvastøl (3), Dan Joar Vårdal Høiås (2), Vetle Røyseth og Tarjei Ormbostad eitt mål kvar. For forsvarar Tarjei var dette årets første seriemål, så det var stas!

Sluttresultatet vart 7-2 til heimelaget.

Spelarane har vist god innsats på treningane og har forstått at dei må stå på for å vinne kampar igjen. Laget har likevel mykje å gå på, spesielt når det gjeld raskare og meir nøyaktige pasningar.

Neste torsdag er det bortekamp mot Florø 2, og då må Tambar-gutane heve seg enda nokre hakk.

Laget er påmeldt til Førde Cup 11. september og til Bend It Cup i Naustdal søndag 26. september. "

21.08.10 Årets fyrste serietap for G12

Refferat frå trenar Ivar Longvastøl:

" Lillegut 12 møtte Svelgen på heimebane torsdag, og gutane tok komandoen frå start. Mange sjansar i starten, men skota gjekk utanfor eller rett på ein god og heldig gjestekeeper. Det låg liksom i lufta at dette var ikkje vår dag.

Så kontra også Svelgen inn to mål og leia 0-2 til pause.

Etter pause fekk vi endeleg hol på byllen og Dan Joar heada først inn reduseringa, og han scora også sitt andre mål for dagen. Begge måla var fine prestasjonar. Svelgen slapp til ein gong til, og trass i hardt Tambar-press mot slutten, vart det 2-3 siger til bortelaget.

Litt flaks for dei, men vi spela ikkje nokon god kamp. Laget var prega av sommarferien, og for mange spelarar skulle avgjere kampen åleine. Dermed vart det krampaktig, for mykje dribling og mange halvgode avslutningar, i staden for å la "ballen gjere arbeidet" og spele oss fram til betre avslutningsmoglegheiter.

Innsatsen var brukbar, men disiplinen i det defensive arbeidet var ikkje like bra som i vårsesongen.

Simon fekk ein skade i tommelen, som han trudde var forstuving, men det viste seg at han har brote fingeren og måtte operere fredag. Det kallar vi å blø for laget! Dermed vert også ein av nøkkelspelarane våre vekke i fleire veker, men då får andre sjansen til å vise seg fram.  God betring, Simon!

Anders Steiro Herstad fekk prøve seg på midtbana og la ned mykje godt arbeid. For laget samla  ventar vi betre spel når fleire av spelarane våre kjem i haustform. Neste seriekamp er borte mot Jølster 2. "

11.06.10 Ny spiss scora to mål

Ny spiss: Hallvard Birkeland Stølsvik spelar i år spiss på Tambar Fotball sitt G98-lag. Foto: Ivar
Longvastøl.

Trenar for G98, Ivar Longvastøl, har sendt oss rapport frå laget sin kamp på torsdag mot Førde 5 :

" Hallvard Birkeland Stølsvik har tidlegare spela mest i forsvar. I år får han prøve seg som spiss og putta på to mål mot Førde 5 på Naustdal stadion torsdag. Hard jobbing og ein god skotfot gir resultat!

I denne kampen var også to andre "ferskingar" som gjorde eit solid come back. Anders Herstad spela i forsvar og sette inn fleire sugande taklingar. Mathias Veien vart testa både som flankespelar på midtbana og som spiss, og han serverte mange gode pasningar.

Vi var førebudde på ein jamn og spennande kamp, og slik vart det også, sjølv om heimelaget var i føringa nesten heile vegen.

Førde scora det første målet, men så markerte Tambar sine måltjuvar seg raskt. Dan Joar har ein god skotfot og er farleg så snart han får litt plass. Sigve scora kampens mål på ei knallhard heading. Dan Joar slo inn frå høgresida (eller var det eit skot??) og Sigve gjekk opp og dunka ballen i krysset med hovudet frå kort hald. Målet såg ut til å setje ein støkk i motstandarane.

Alle spelarane skal ha ros for god innsats. Ole Marius og Martin Andreas gjorde jobben i mål, og i forsvar delte Andreas, Anders og Tarjei på jobben saman med Simon som var "forsvarssjef" og var flink til å dirigere medspelarane. Andreas gjorde også ein kjempeinnsats på slutten som defensiv midtbanespelar.

Lenger framme på bana la Martin André ned ein stor jobb både framme og bak, og han var truleg den som sprang mest saman med Sigve. Vetle starta som spiss, og sjølv om han hadde lova å score to mål, så lykkast han ikkje heilt denne gongen. Han jobba godt på midtbana etter pause.

Førde hadde ein svært driblesterk spelar i Brage Espe Sandvoll (mora er frå Naustdal), og han var farleg kvar gong han fekk litt rom. Såleis fekk laget nytte av mykje øving på 1. og 2. forsvarar, der sistemann sikrar den som prøver å takle først. Vi lykkast ikkje kvar gong, men fekk god øving i forsvarsspel.

Sluttresultat: 8-6 til Tambar. Neste oppgåve for G98 er Grodås Cup. "

Målscorarar:
Dan Joar: 4
Hallvard: 2
Sigve: 2

03.06.10 Ny stor siger for G 98 i Førde

Bilde: Sigve vart mestscorande då Tambar Fotball sine G98 spelte mot Førde 4 i kveld.

Trenar Ivar Longvastøl har sendt oss denne rapporten frå gutane sin kamp i kveld:

" G12 møtte Førde 4 på Haugum torsdag ettermiddag. Kampen var jamn i starten,  og Tambarskjelvar var forsiktige og slappe i duellane slik at Førde tok initiativet.

Dermed gjekk heimelaget opp i 1-0 og 2-1, men deretter vakna Tambar og spelarane fekk fart på ballen og kom til avslutningar. Stillinga ved pause var 6-2 til oss.

Etter kvilen starta vi nølande, noko som truleg skuldast at fleire spelarar fekk prøve seg i uvane posisjonar. Førde scora først eitt, fekk sjølvtillit og putta på to til før Tambar tok kontrollen igjen.

Derifrå og ut scora Tambar fem mål og heimelaget ingen, slik at sluttresultatet vart 11-5 til oss!

Denne kampen stod Andreas og Martin Andreas i mål kvar sin omgang, og dei klarte seg fint begge to. I forsvaret spela Sivert og Tarjei storparten av tida, og dei samarbeider bra, sjølv om dei enno har litt å jobbe med der.

På midtbana spelar Simon sentralt i ei defensiv rolle, og han løyser den oppgåva på ein måte som er svært viktig for laget. Han er også ein dyktig langskyttar. Sigve legg ned stor innsats og spring mange meter på midtbana, og denne gongen fekk han også svært god utteljing på sjansane.

Martin André og Vetle deler på å spele spiss og midtbane, og dei jobbar godt. Martin André har fart og teknikk og kan godt avslutte litt oftare, og han er flink til å spele fram andre. Vetle er ein måljeger som ofte dukkar opp på rett plass framfor mål. Dan Joar er ein svært god avsluttar, som også skyt presist frå langt hald. Han har framleis meir å gå på når det gjeld innsats.

Hallvard gjorde eit flott come back etter å ha bestemt seg for å satse på fotballen igjen. Han har høgt treningsframmøte og god innstilling. For keeper/midtbanespelar Ole Marius var det ekstra moro at han scora sitt første seriemål i år. Ole Marius har flott innstilling og jobbar hardt når han får prøve seg som utespelar.

På to kampar har vi slått Førde-lag med til saman 23-8 i målskilnad. Komande torsdag, 10. juni, møter vi Førde 5 som truleg er det beste laget i vår avdeling frå storbyen. Kampen går klokka 18.00 på Naustdal stadion. "

Målscorarar mot Førde :
Sigve 7
Simon 2
Ole Marius 1
Dan Joar 1

27.05.10 G 98: Strafferedning mot Florø

Bilde: Tambarkeeper Ole Marius redda Tambar for nederlag, etter strafferedninga mot Florø i kveld.

Trenar Ivar Longvastøl skriv fyljande om kveldens kamp:

" Ole Marius vart dagens helt då han redda straffespark frå Florø 2 i andre omgang i G12-kampen på Naustdal stadion torsdag.

Skotet var hardt og plassert heilt ute ved stanga til høgre for keeper, men Ole Marius kasta seg lynraskt og slo ballen ut. Då vanka det klemmar frå lykkelege medspelarar.

G98 var førebudd på ein jamn kamp, og det vart det også. Tette markeringar og tett press gjorde at Tambar kjempa seg til eit overtak utover i første omgang.

Det gav også resultat, og Sigve, Dan Joar (2) og Vetle scora alle heimelagets mål før pause. Florø var litt heldige og kjempa inn to mål, slik at pauseresultatet var 4-2.

I andre omgang tok Florø meir over, og Tambar sine spelarar orka ikkje springe like mykje som før kvilen.

Trass i strafferedning og fleire andre gode redningar, klarte Florø å score to gonger. Vi får seie at det siste målet var ei lita jubileumsgåve frå oss til byen i vest :-)

Sluttresultatet vart altså 4-4, og uavgjort gav nok eit rett bilete av spel og sjansar.

Mykje å glede seg over, og sjølvsagt mykje å jobbe vidare med. Kanskje må spelarane legge inn nokre ekstra økter med kondisjon? Fotball handlar også mykje om både ork og vilje til å springe og jobbe!

Neste kamp er borte mot Førde 4, på Haugum torsdag 3. juni klokka 17. "

Bilder frå kampen

21.05.10 Ny stor siger til G98

I likheit med Tambar sitt gutelag, var også G98 til førde og spelte kamp i går kveld. Frå den målrike kampen på Slåtten kunstgrasbane, har trenar Ivar Longvastøl gitt oss fyljande rapport:

" G98 held fram med å spele fin fotball og score mange mål. Torsdag kveld var Førde 2 motstandar på bana ved Slåtten skule.

Etter ein ganske jamn 1. omgang leia Tambar 4-2. Etter pause gjekk ballen mykje raskare. Då kom også sjansane og Førde mista nok litt motet etter kvart som måla suste forbi øyrene på målmannen. Mange fine mål, både på skot og heading.

Det mest positive var at Tambar heldt fram med å spele bra og let ballen gå raskt også etter at laget leia med mange mål. Ingen let egosime øydeleggje for laget. Sluttresultatet vart 12-3 til oss.

G98 set opp tre ting vi skal jobbe spesielt med i kvar kamp. Denne gongen satsa vi på 1)Godt humør og positive kommentarar, 2) Ballkontroll og nøyaktige pasningar og 3) Breidde i angrepsspelet.

Spel og resultat tyder på at vi fekk det bra til. Ros også denne gongen til keeperane våre som har vorte veldig flinke på igangsetjing. Treninga gir resultat!

Etter tre serierundar, halvvegs i vårsesongen, står laget med tre sigrar og 27-6 i målskilnad.

Den gode statistikken kjem nok både av at laget har blitt betre og at motstanden ikkje har vore den aller sterkaste. Difor er det berre å trene hardt vidare.

Komande torsdag, 27. mai, får vi Florø 2 på besøk på Naustdal stadion, og vi håper på ein god og jamn kamp. "

09.05.10 Ny flott kamp av lillegut 98

Bilde: Tambar-laget mot Jølster. Bak f.v. Sivert Andal, Simon Indrekvam, Martin André Seljevoll,
Tarjei Ormbostad og Dan Joar Vårdal. Framme f.v. Sigve Heggedal Longvastøl, Ole Marius
Vestrheim, Andreas Apelseth, Martin Andreas Hamre og Vetle Røyseth. Foto: Ivar Longvastøl

Både Tambar Fotball sitt jente- og gutelag i klasse 1998 spelte kamp på Naustdal stadion sist torsdag. I tillegg spelte gutar 99 bortekamp same dagen. Frå gutar 98 sin kamp mot Jølster 2 har trenar Ivar Longvastøl dette å sei om kampen:

 

30.04.10 God sesongstart for G12

Bilde: Tarjei og Andreas i aksjon frå ein kamp på Naustdal stadion sist sesong.

Trenar for G12, Ivar Longvastøl, har sendt oss fyljande rapport frå lagets kamp i Svelgen i går kveld:

" Lillegut 98 fekk ein god start på sesongen i Svelgen torsdag kveld, på den nye og fine kunstgrasbana der.

Laget har drilla ein god del på organisering og på arbeidsoppgåvene i dei ulike posisjonane på bana, og det gav resultat.

Svelgen har to-tre svært gode enkeltspelarar, og Tambar vart pressa i starten. Vi fekk likevel det første målet og tok meir kontroll i kampen utover i 1. omgang.

I andre omgang vart det ein jamn og tett kamp, og meir spennande enn sluttresultatet tilseier. Kampen stod og bikka på 4-3 til Tambar. Svelgen fekk eit heldig frispark som dei sette i muren og over, og Tambar putta på to mål i sluttminutta slik at resultatet vart 6-3 til oss.

Flott innsats av heile laget. Andreas Apelseth og Ole Marius Vestrheim stod kvar sin omgang i mål og gjorde sine saker bra. Strålande innsats i forsvar av Tarjei Ormbostad og Sivert Andal. Sigve Heggedal Longvastøl, Vetle Røyseth, Simon Indrekvam og Dan Joar Vårdal sprang og jobba på midtbana. Martin Andreas Hamre jobba hardt og godt både som defensiv midtbanespelar og i forsvar. Martin André Seljevoll brukte fart og teknikk som spiss.

Laget er heldig som har mange spelarar som kan lage mål. Denne gongen scora Martin André (2), Simon, Dan Joar, Sigve og Sivert.

Mykje postivt å melde, ikkje minst laginnsatsen. Laget har meir å gå på når det gjeld å få fart på ballen. Litt for mykje dribling på midtbana øydela stundom for rytmen i spelet. Det krev også at lagkameratane vert flinkare til å skaffe seg rom og "vise seg" fram for ballførar.

Neste kamp er torsdag 6. mai klokka 18, heime mot Jølster. Då ventar heilt sikkert ein ny, tøff motstandar. "